മ്യുണീച്ച്: കഴിഞ്ഞവര്ഷം ജര്മ്മനിയിലെ കത്തോലിക്കാസഭയില് നിന്ന് വിട്ടുപോയത് 220,000 വിശ്വാസികള്. ഇന്നലെ ജര്മ്മനിയിലെ കത്തോലിക്കാസഭ പുറപ്പെടുവിച്ച പത്രക്കുറിപ്പിലാണ് സങ്കടകരമായ ഈ വാര്ത്തയുള്ളത്. എങ്കിലും 2019 ലേതിനെക്കാള് കുറവ് സംഖ്യയാണ് രേഖപ്പെടുത്തിയിരിക്കുന്നത്.
2019 ല് റിക്കാര്ഡ് കൊഴിഞ്ഞുപോക്കാണ് രേഖപ്പെടുത്തിയിരുന്നത്. 272,771 പേരാണ് പ്രസ്തുതവര്ഷം ജര്മ്മന്സഭ വിട്ടുപോയത്. നമ്മുടെ സമൂഹത്തെ സംബന്ധിച്ചിടത്തോളം വളരെ വേദനാകരമായ കാര്യമാണ് ഇത്. ഇക്കാര്യം വളരെ ഗൗരവത്തോടെയാണ് കാണുന്നത്. സത്യസന്ധമായും തുറന്നും ഈ വിഷയത്തെ നാം അഭിമുഖീകരിക്കേണ്ടിയിരിക്കുന്നു. നമ്മെ അഭിമുഖീകരിക്കുന്ന ഈ ചോദ്യങ്ങള്ക്ക് കൃത്യമായ ഉത്തരവും നല്കേണ്ടിയിരിക്കുന്നു.
ലൈംഗികാപവാദങ്ങള് ഈ കൊഴിഞ്ഞുപോകലിന് പ്രധാന കാരണമായി വിചാരിക്കേണ്ടിയിരിക്കുന്നു. സിനഡല് വേ പുതിയ വിശ്വാസം രൂപപ്പെടുത്താന് കാരണമാകുമെന്നും വിശ്വസിക്കുന്നു. ജര്മ്മന് ബിഷപ്സ് കോണ്ഫ്രന്സ് പ്രസിഡന്റ് ജോര്ജ് ബാറ്റ്സിംങ് പറയുന്നു.
കഴിഞ്ഞ വര്ഷങ്ങളില് വിവാഹം, മാമ്മോദീസാ, സ്ഥൈര്യലേപനം തുടങ്ങിയകൂദാശകള് സ്വീകരിക്കുന്ന വിശ്വാസികളുടെ എണ്ണത്തിലും വന്കുറവ് ഉണ്ടായിട്ടുണ്ട്.