പരിശുദ്ധ മറിയത്തെ നാം സ്‌നേഹിക്കുന്നവരാണ്. പക്ഷേ മറിയത്തെ നാം സ്‌നേഹിക്കുന്നുണ്ടെങ്കില്‍ മറിയത്തിന്റെ മാതൃകയനുസരിച്ച് ക്ലേശങ്ങള്‍സഹിക്കണം എന്നാണ് മരിയാനുകരണം നമ്മോട് പറയുന്നത്.
നിന്റെ അമ്മയായ മറിയത്തെ നീ യഥാര്‍ത്ഥത്തില്‍ സ്‌നേഹിക്കുന്നെങ്കില്‍ ക്ലേശങ്ങളുടെ മധ്യത്തില്‍ അവളുടെ സംരക്ഷണം നീ ആഗ്രഹിക്കുന്നെങ്കില്‍ കുരിശിന്നരികില്‍ അവളൊടൊന്നിച്ചു നില്ക്കുക. ഇതാണ് മരിയാനുകരണം പറയുന്നത്. അമ്മയുടെ വ്യാകുലങ്ങളിലും മകന്റെ പീഡകളിലും മുഴുഹൃദയത്തോടെ പങ്കുകൊള്ളുക.
എന്നാല്‍ മരണസമയത്ത് അവള്‍ നിന്റെ അരികിലുണ്ടായിരിക്കും. ഈശോ അനുഭവിച്ച പീഡകളെ പ്രതി മാതാവ് ചിന്തിയ കണ്ണുനീരിനെക്കുറിച്ച് നിരന്തരം ഭക്തിപൂര്‍വ്വം ധ്യാനി്ക്കുന്നവര്‍ക്ക് ദൈവകാരുണ്യത്തില്‍ പൂര്‍ണ്ണമായും ആശ്രയിക്കാവുന്നതാണ്.വിശിഷ്യ ഈശോയുടെയും മറിയത്തിന്റെയും പ്രത്യേക വാത്സല്യത്തിന്നവര്‍ പാത്രീഭൂതരാകുകയും ചെയ്യും.
ഈശോയോടും മറിയത്തോടുമുളള സവിശേഷമായ സ്‌നേഹം നിമിത്തം അവരോടൊന്നിച്ചു കുരിശിന്‍ചുവട്ടില്‍ നില്ക്കാന്‍ നമുക്ക് ശ്രമിക്കാം. അതുവഴി ആത്മാവിലും ശരീരത്തിലും നമുക്ക് ദൈവികാനന്ദവും ആശ്വാസവും സമാധാനവും കൈവരിക്കുകയും ചെയ്യാം.
