ആര്‍ക്കും എളുപ്പം പറയാന്‍ കഴിയുന്ന മറുപടിയാണ് ഈ ചോദ്യത്തിന്റേത്. പുരോഹിതര്ക്കും മെത്രാന്മാര്‍ക്കുമാണ് അതിനുള്ള അധികാരം. സാധാരണയായി അവരാണ് മാമ്മോദീസാ ചടങ്ങുകളുടെ കാര്‍മ്മികരും. എന്നാല്‍ അത്യാവശ്യസന്ദര്‍ഭങ്ങളില്‍ ഏതു വ്യക്തിക്കും മാമ്മോദീസാ സ്വീകരിച്ചിട്ടില്ലാത്ത വ്യക്തികള്‍ക്കുപോലും മാമ്മോദീസാ നല്കാന്‍ കഴിയും.
കത്തോലിക്കാസഭയുടെ മതബോധനഗ്രന്ഥത്തില്‍ അതേക്കുറിച്ച് പറയുന്നത് ഇപ്രകാരമാണ്:
അത്യാവശ്യസന്ദര്‍ഭത്തില്‍ ഏതു വ്യക്തിക്കും മാമ്മോദീസാ സ്വീകരിച്ചിട്ടില്ലാത്തവര്‍ക്കുപോലും അയാള്‍ക്ക് ആവശ്യമായ നിയോഗമുണ്ടെങ്കില്‍ ത്രീത്വനാമവാക്യം ഉപയോഗിച്ച് മാമ്മോദീസാ നല്കാം. ആവശ്യമായ നിയോഗം എന്നതു സഭ മാമ്മോദീസ നല്കുമ്പോള്‍ ചെയ്യുന്നതെന്തോ അതു ചെയ്യാന്‍ ആഗ്രഹിക്കുക എന്നതാണ്. ഈ സാധ്യതയുടെ കാരണം സഭ കാണുന്നത് ദൈവത്തിന്റെ സാര്‍വത്രിക രക്ഷാകര ഹിതത്തിലും രക്ഷയ്ക്ക് മാമ്മോദീസാ അത്യാവശ്യമാണെന്ന വസ്തുതയിലും ആണ്.
