സന്തോഷിക്കാനുളള വിവിധ മാര്‍ഗ്ഗങ്ങള്‍ അന്വേഷിക്കുന്നവരും ആ വഴിയെ സഞ്ചരിക്കുന്നവരുമാണ് മനുഷ്യരെല്ലാവരും. വിവിധ കാരണങ്ങള്‍ കൊണ്ട് പക്ഷേ മനുഷ്യന് സന്തോഷം അനുഭവിക്കാന്‍ കഴിയുന്നില്ല. അവന്‍ ആഗ്രഹിക്കുന്നതുപോലെയൊന്നും സംഭവിക്കാത്തതുകൊണ്ടും വിചാരിക്കുന്നതിന് വിരുദ്ധമായി സംഭവിക്കുന്നതുകൊണ്ടുമാണ് ഇത്. ലോകത്തിലേക്കാണ് നാം നോക്കുന്നത്.
ലോകം മനുഷ്യന് നല്കുന്നത് ദു:ഖങ്ങളും സങ്കടങ്ങളും മാത്രമാണ്. സ്വര്‍ഗ്ഗത്തിലേക്ക് നോക്കാന്‍ മാത്രം നമ്മുടെ കണ്ണുകള്‍ക്ക് തെളിച്ചമില്ല. ഇങ്ങനെയൊരു സാഹചര്യത്തില്‍ നാം ദൈവത്തെ എപ്പോഴും സ്മരിക്കുക. ദൈവാവബോധത്തില്‍ ജീവിക്കുക.ദൈവം വലിയ കൂട്ടുകാരനും സഹയാത്രികനുമായി മാറുന്ന അനുഭവം രുചിച്ചറിയുക. പലപ്പോഴും നമ്മുക്ക് സന്തോഷിക്കാന്‍ കഴിയാത്തത് ദൈവസാന്നിധ്യം മനസിലാക്കാതെ പോകുന്നതുകൊണ്ടാണ്.
ഏറ്റവും അടുപ്പമുള്ള ഒരു ചങ്ങാതി കൂടെയുള്ളപ്പോള്‍ നമുക്കെന്തു സന്തോഷമാണ്. അവന്‍ നല്കുന്ന സുരക്ഷിതത്വം എത്രയോ വലുതാണ്. ഇതുതന്നെയാണ് ദൈവാനുഭവത്തില്‍ ജീവിക്കുമ്പോഴും സംഭവിക്കുന്നത്. അതുകൊണ്ട് ഈ പ്രഭാതം മുതല്‍ നമുക്ക് കൂടുതലായിദൈവത്തെ ഓര്‍മ്മിക്കാം. ദൈവം കൂടെ നടക്കുന്നതുപോലെ തിരിച്ചറിയാം.
ദൈവം കൂടെയുളളപ്പോള്‍ നമുക്ക് സന്തോഷിക്കാതിരിക്കാനാവുമോ.. ഇനിയെന്നും നമ്മുടെ ജീവിതം സന്തോഷഭരിതമാകും. ദൈവത്തെ ഓര്‍മ്മിക്കുക..
