കാഞ്ഞിരപ്പള്ളി: കാഞ്ഞിരപ്പള്ളി രൂപതയുടെ സുവർണ്ണ ജൂബിലി ആഘോഷങ്ങൾക്ക് ആമുഖമായി സംഘടിപ്പിക്കപ്പെട്ട നേതൃസംഗമങ്ങൾ സമാപിച്ചു. രൂപതയിലെ പതിമൂന്ന് ഫൊറോനകളെയും കേന്ദ്രീകരിച്ച് നടന്ന ഈ സംഗമപരമ്പരയ്ക്ക് ഏപ്രിൽ 26, ഞായറാഴ്ച പൊൻകുന്നം ഫൊറോനയിൽ നടന്ന സമ്മേളനത്തോടെയാണ് സമാപനമായത്. മാർച്ച് 14-ന് വെളിച്ചിയാനിയിലാരംഭിച്ച സംഗമങ്ങളിൽ രൂപതയിലെ വിവിധ ഇടവകകളിൽ നേതൃത്വശുശ്രൂഷ നിർവഹിക്കുന്ന ആയിരത്തിലധികം പ്രതിനിധികൾ പങ്കെടുത്തു.
ഇടവക കൈക്കാരൻമാർ, പാരിഷ് കൗൺസിൽ സെക്രട്ടറിമാർ, ജൂബിലി കമ്മിറ്റി കൺവീനർമാർ, സൺഡേ സ്കൂൾ പ്രധാനാധ്യാപകർ, വിവിധ സംഘടനകളുടെ അധ്യക്ഷന്മാർ, കുടുംബക്കൂട്ടായ്മ ഏകോപന കൺവീനർമാർ, പാസ്റ്ററൽ കൗൺസിൽ അംഗങ്ങൾ എന്നിവരുടെ സജീവ സാന്നിധ്യം സമ്മേളനങ്ങളെ ശ്രദ്ധേയമാക്കി.
വൈദിക-സന്യസ്ത-അല്മായ പ്രതിനിധി സമിതികൾ വിഭാവനം ചെയ്ത ജൂബിലി കർമ്മപദ്ധതികൾ വിശദീകരിക്കുന്നതിനും അവ ഇടവകതലങ്ങളിൽ കാര്യക്ഷമമായി നടപ്പിലാക്കുന്നതിനുമായാണ് സംഗമങ്ങൾ ക്രമീകരിച്ചത്. രൂപതാ വികാരി ജനറാൾ റവ. ഡോ. സെബാസ്റ്റ്യൻ കൊല്ലംകുന്നേൽ, പാസ്റ്ററൽ ആനിമേഷൻ ഡയറക്ടറും പി.ആർ.ഒയുമായ ഫാ. സ്റ്റാൻലി പുള്ളോലിക്കൽ എന്നിവർ സംഗമങ്ങൾക്ക് നേതൃത്വം നൽകി.
രൂപതയുടെ സുവർണ്ണ ജൂബിലി വർഷാചരണത്തിന് മെയ് 12,ചൊവ്വാഴ്ച കുട്ടിക്കാനം മരിയൻ കോളേജിൽ തിരിതെളിയും. സീറോ മലബാർ സഭ മേജർ ആർച്ച്ബിഷപ്പ് മാർ റാഫേൽ തട്ടിൽ മെത്രാപ്പോലീത്ത ആഘോഷങ്ങളുടെ ഔദ്യോഗിക ഉദ്ഘാടനം നിർവഹിക്കും. മെയ് 12 മുതൽ 15 വരെ മരിയൻ കോളേജിൽ വെച്ച് നടക്കുന്ന എപ്പാർക്കിയൽ അസംബ്ലിയോടനുബന്ധിച്ച് നടത്തപ്പെടുന്ന ഉദ്ഘാടന സമ്മേളനത്തിൽ എപ്പാർക്കിയൽ അസംബ്ലി പ്രതിനിധികൾ പങ്കുചേരും.
ഫോട്ടോ: പൊൻകുന്നം ഫൊറോന നേതൃസംഗമത്തിൽ രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ജൂബിലി കർമ്മ പദ്ധതികൾ വിശദീകരിക്കുന്നു.
ഫാ. സ്റ്റാന്ലി പുള്ളോലിക്കല്
പി.ആര്.ഒ.
മൊബൈല്: 9496033110
