കൊച്ചി: നാദിര്ഷ സംവിധാനം ചെയ്ത ഈശോ എന്ന സിനിമയ്ക്ക് പ്രദര്ശനാനുമതി നല്കരുതെന്നാവശ്യപ്പെട്ടുളള പൊതുതാല്പര്യഹര്ജി ഹൈക്കോടതി തള്ളി. ക്രിസ്ത്യന് അസോസിയേഷന് ആന്ഡ് അലയന്സ് ഫോര് സോഷ്യല് ആക്ഷന് എന്ന സംഘടന നല്കിയ ഹര്ജിയാണ് ചീഫ് ജസ്റ്റീസ് എസ് മണികുമാര്, ജസ്റ്റീസ് ഷാജി പി ചാലി എന്നിവരുള്പ്പെട്ട ഡിവിഷന് ബെഞ്ച് തള്ളിയത്.
ക്രിസ്തുവിന്റെ പേര് സിനിമയ്ക്കിട്ടത് മതവികാരം വ്രണപ്പെടുത്തുമെന്ന് ചൂണ്ടിക്കാട്ടിയാണ് ഹര്ജിക്കാര് ഹൈക്കോടതിയെ സമീപിച്ചത്. എന്നാല് ഈശോ എന്ന പേരു നല്കിയെന്ന കാരണത്താല് സിനിമാ പ്രദര്ശനം തടയുന്നതില് കോടതിക്ക് ഇടപെടാന് കഴിയില്ലെന്നും ഹര്ജി നിലനില്ക്കില്ലെന്നും ഡിവിഷന് ബെഞ്ച് വ്യക്തമാക്കി.