ജീവിതത്തില്‍ എന്തുമാത്രം വേദനകളിലൂടെയാണ് നാം ഓരോരുത്തരും കടന്നുപോകുന്നത്. പക്ഷേ ആ വേദനകളൊന്നും നാം ദൈവത്തോട് പ്ങ്കുവയ്ക്കുന്നില്ല. പകരം നാം തന്നെ നമ്മുടെ ഒറ്റപ്പെട്ട സങ്കടങ്ങളുമായി കഴിഞ്ഞുപോകുകയാണ്.രാത്രികാലങ്ങളില്‍ ആരും കാണാതെ കരയുന്നു. അല്ലെങ്കില്‍ മുറിയടച്ചിരുന്ന് കൈകള്‍ ഉയര്‍ത്തി നിലവിളിക്കുന്നു. എന്നാല്‍ നമ്മില്‍ നിന്ന് ദൈവം പ്രതീക്ഷിക്കുന്നത് മറ്റൊന്നാണ്. ഹോസിയ 7: 14 ല്‍ നാം അത് കാണുന്നുണ്ട്. ഹൃദയം നൊന്തു എന്നെ വിളിച്ചപേക്ഷിക്കുന്നതിന് പകരം അവര്‍ കിടക്കയില്‍ വീണു വിലപിക്കുന്നു. ധാന്യത്തിനും വീഞ്ഞിനും വേണ്ടി അവര്‍ തങ്ങളെതന്നെ മുറിവേല്പിക്കുന്നു.
നാം നമ്മുടെ സങ്കടങ്ങള്‍ പൊതിഞ്ഞുകെട്ടി വയ്‌ക്കേണ്ടവരല്ല അത് ദൈവത്തോട് വിവരിക്കേണ്ടവയാണ്. സങ്കീര്‍ത്തനങ്ങള്‍ 34:18 ല്‍ നാം ഇങ്ങനെ വായിക്കുന്നുണ്ടല്ലോ ഹൃദയം നുറുങ്ങിയവര്‍ക്ക് കര്‍ത്താവ് സമീപസ്ഥനാണ്. മനമുരുകിയവരെ അവിടുന്ന് സംരക്ഷിക്കും. അതുപോലെ സങ്കീ് 119 :26 ല്‍ നാം ഇങ്ങനെ വായിക്കുന്നു. എന്റെ അവസ്ഥ വിവരിച്ചപ്പോള്‍ അങ്ങ് എനിക്ക് ഉത്തരമരുളി.
അതുകൊണ്ട് നാം നമ്മുടെ അവസ്ഥകള്‍ ദൈവത്തോട് വിവരിക്കുക. നാം കടന്നുപോകുന്ന പ്രശ്‌നങ്ങള്‍, അവസ്ഥകള്‍ ഏതുമായിരുന്നുകൊള്ളട്ടെ അവ ദൈവം കാണും. ദൈവം നമ്മോട് കരുണ കാണിക്കും.
