ടൂറിനിലെ തിരുക്കച്ചയുടെ ചിത്രങ്ങള്‍ പകര്‍ത്തിയ ഫോട്ടോഗ്രാഫര്‍ വെര്‍നോണ്‍ മില്ലറിന്റെ ചിത്രങ്ങള്‍ക്കായി ഒരു വെബ്‌സൈറ്റ്. കത്തോലിക്കര്‍ക്കും ഗവേഷകര്‍ക്കും തിരുക്കച്ചയുടെ ചിത്രങ്ങള്‍ സംലഭ്യമാക്കുക എന്നതാണ് ഈ വെബ്‌സൈറ്റിന്റെ ലക്ഷ്യം.
14 അടി അഞ്ച് ഇഞ്ച് നീളവും മൂന്നടി ഏഴ് ഇഞ്ച് വീതിയുമുള്ള ലിനന്‍ തുണിയിലാണ് പീഡിതനും ക്രൂശിക്കപ്പെട്ടവനുമായ ഒരു മനുഷ്യന്റെ ചിത്രം പതിഞ്ഞിരിക്കുന്നത്. കുരിശുമരണത്തിന് ശേഷം ക്രിസ്തുവിന്റെ മൃതശരീരം പൊതിഞ്ഞത് ഈ തുണിയിലാണ് എന്നാണ് വിശ്വാസം.
1977 മുതല്‍ 1981 വര ഭൗതികശാസ്ത്രജ്ഞര്‍, രസതന്ത്രജ്ഞര്‍, പാത്തോളജിസ്റ്റുകള്‍, എന്‍ജിനീയേഴ്‌സ് തുടങ്ങിയവര്‍ ഈ കച്ചയെക്കുറിച്ച് പഠനം നടത്തിയിരുന്നു. പഠനങ്ങള്‍ക്ക് ശേഷം അവര്‍ കണ്ടെത്തിയ നിഗമനം ഇങ്ങനെയായിരുന്നു. പീഡിതനും ക്രൂശിതനുമായ ഒരു മനുഷ്യന്റെ രൂപമാണ് ഈ തുണിയില്‍ പതിഞ്ഞിരിക്കുന്നതെന്നും ഇത് യഥാര്‍ത്ഥമാണെന്നും ഒരിക്കലും ഒരു കലാകാരന്റെ സൃഷ്ടിയല്ലെന്നുമായിരുന്നു.
വെര്‍നോണ്‍ മില്ലര്‍ തിരുക്കച്ച പ്രോജക്ടിന്റെ ഔദ്യോഗിക ഫോട്ടോഗ്രാഫറാണ്.shroudphotos. com ല്‍ ഇദ്ദേഹത്തിന്റെ ചിത്രങ്ങള്‍ ലഭ്യമാണ്.കാണാന്‍ മാത്രമല്ല ഡൗണ്‍ലോഡ് ചെയ്യാനും സാധിക്കും അള്‍ട്രാവയലറ്റ് പ്രകാശത്തില്‍ എടുത്തിരിക്കുന്നവയാണ് ഈ ചിത്രങ്ങള്‍.
ഇത് മില്ലറുടെ വലിയൊരു ആഗ്രഹമായിരുന്നുവെന്നും ഇതുവരെ ഫോട്ടോകള്‍ കണ്ടിട്ടില്ലാത്തവര്‍ക്ക് കാണാന്‍ അവസരം കൊടുക്കുകയാണ് ഇതിലൂടെ ചെയ്യുന്നതെന്നും സംഘാടകര്‍ വ്യക്തമാക്കുന്നു.
തിരുക്കച്ചയുടെ ആദ്യ ചിത്രം എടുത്തത് 1898 ല്‍ ആയിരുന്നു. ഫോട്ടോഗ്രഫിയുടെ തുടക്കകാലമായിരുന്നു അത്. ഇന്നുവരെ തിരുക്കച്ചയുടെ 32,000 ഫോട്ടോകള്‍ എടുത്തിട്ടുണ്ട്.
