വത്തിക്കാന്‍ സിറ്റി: തന്റെ അന്ത്യസ്ഥാനം നേരത്തെ തന്നെ നി്ശ്ചയിക്കപ്പെട്ടതാണെന്ന് ഫ്രാന്‍സിസ് മാര്‍പാപ്പ. സെന്റ് മേരീ മേജര്‍ ബസിലിക്കയിലാണ് തന്നെ അടക്കം ചെയ്യേണ്ടതെന്നും പാപ്പ വ്യക്തമാക്കി. പരിശുദ്ധ അമ്മയോടുളള ഭക്തിയാണ് ഇത്തരമൊരു തീരുമാനമെടുക്കാന്‍ തന്നെ പ്രേരിപ്പിച്ചിരിക്കുന്നതെന്നും അദ്ദേഹം പറഞ്ഞു. മെക്‌സിക്കന്‍ ടെലിവിഷന്‍ പ്രോഗ്രമായ N+ ന് നല്കിയ അഭിമുഖത്തിലാണ് പാപ്പ ഇക്കാര്യം വ്യക്തമാക്കിയത്.
സെന്റ് മേരി മേജര്‍ ബസിലിക്ക അഞ്ചാം നൂറ്റാണ്ടുമുതല്‍ തന്നെ പ്രശസ്തമായ ദേവാലയമാണ്. ലോകത്തിലെ തന്നെ ഏറ്റവും പ്രശസ്തമായ കത്തോലിക്കാ ദേവാലയവും. റോമിലെ പ്രധാനപ്പെട്ട നാലു മേജര്‍ ബസിലിക്കകളില്‍ ഒന്നും. നൂറിലധികം തവണ ഫ്രാന്‍സിസ് മാര്‍പാപ്പ ഈ ബസിലിക്കയില്‍ പ്രാര്‍ത്ഥനയ്ക്കായി എത്തിയിട്ടുണ്ട്. നിലവില്‍ ആറു മാര്‍പാപ്പമാരെ അടക്കം ചെയ്തിരിക്കുന്നത് ഇവിടെയാണ്. സെന്റ് പീറ്റേഴ്‌സ് ബസിലിക്കയിലാണ് സാധാരണയായി മാര്‍പാപ്പമാരുടെ കബറിടം സ്ഥിതി ചെയ്യുന്നത്.
