കാക്കനാട്: കേരളസഭാനവീകരണത്തിന്റെ രണ്ടാം ഘട്ടമായി അടുത്തവര്‍ഷം 2024 യുവജനവര്‍ഷമായി ആചരിക്കുന്നു. കേരള കത്തോലിക്കാ മെത്രാന്‍ സമിതിയുടെ സമ്മേളാനന്തരം ഇറക്കിയ പത്രക്കുറിപ്പിലാണ് ഇക്കാര്യം അറിയിച്ചിരിക്കുന്നത്.
യുവജനങ്ങള്‍ സഭയുടെയും സമൂഹത്തിന്റെയും ചൈതന്യമാണ്. സഭ അവരെ നെഞ്ചോടു ചേര്‍ത്തുപിടിക്കണം. കൂടുതല്‍ ഉത്തരവാദിത്തബോധത്തോടെ തങ്ങളുടെ ദൗത്യം സമൂഹത്തില്‍ നിര്‍വഹിക്കുന്നതിനും രാഷ്ട്രനിര്‍മ്മാണത്തില്‍ ഗൗരവതരമായ ഇടപെടല്‍ നടത്തുന്നതിനും യുവജനങ്ങള്‍ക്കാകണം. ശാസ്ത്രം,വിശ്വാസം, രാഷ്ട്രീയം, സാഹിത്യം, കല എന്നിങ്ങനെ വിവിധങ്ങളായ മേഖലകളിലുളള തങ്ങളുടെ കഴിവുകള്‍ സമൂഹനിര്‍മ്മിതിക്കുവേണ്ടി വ്യയം ചെയ്യുന്നതിലൂടെ യുവത്വം ഫലദായകമാക്കുന്നതിന് അവര്‍ക്ക് സാധിക്കും.
യുവജനങ്ങളുടെ ബൗദ്ധിക സമ്പത്ത് രാജ്യത്തിന് നഷ്ടമാകാന്‍ ഇടയാക്കുന്ന സാഹചര്യങ്ങള്‍ ഒഴിവാക്കപ്പെടുന്നതിന് ഭരണാധികാരികള്‍ അതീവജാഗ്രത പുലര്‍ത്തേണ്ടതുണ്ട്. പത്രക്കുറിപ്പില്‍ പറയുന്നു.
